Minung kan si hnuhnu cun duhzawng kan nei cio. Mi tampiin a thlum le a al kan duh laiah hrekkhat cu a pak, a kha rak duh kan um, a thak zetzet tla thaw rak ti zet khal kan um lala. Cuvekin awnmawi khalah mi tam sawnin a dai, a nem le tingiahngotepawl ngai nuam an ti laiah a sa deuh, a khoh deuh le ti rupro deuh pawl ngai nuam rak ti zet khal an um lala. Hrekkhat cuhnakih rura sawn hman thaw rak ti zet tla an um lailai.
Rock awnmawi hi a tlangpithuin Light Rock, Hard Rock, Heavy Rock tin kan then thei ding. Cui tlunah awnmawi phun dangdang thawn an kawmawk tikah Rock awnmawi phun dangdang an suak ve vivo. Country cu Rock thawn an kawmawk tikah Country Rock ah a cang. Blues cu Rock thawn an rawiawk tikah Blues Rock a si lala. Cun Hip Hop cu Rock thawn an hun cawkrawiih Rap Metal an ti mi ah a suak. Cuvekin Pop Rock, Punk Rock, Alternative Rock, Modern Rock, tvk. in a phunphun an um vivo. Rock tlunlamah cun Metal, Heavy Metal, Death Metal, Thrash Metal, Hard Core, tvk. in rura rapthlak taktakin an um lai nan tui tumih kan rel tum mi cu Rock dinhmun tiang lawng hi a si.
Rock tiih kan sal veten mi tam tak cun tihnung rapthlak, thil tha lo le Pathian duh lo zawngah maw kan ruat deuh theu. Thil ziangkimah hin a sia le a tha hi an rak um ringring ih, thil tha zet kan ti mipawl lakah a siatnak tete an rak um ve theu vekin thil sia kan ti mipawl lak khalah a thatnak tete hi an rak um ve theu. A thupibik cu a sia le a tha kan thlir thiam ih, a siatnak tete kan hrial thiam ding kha a si ko. Rock hmuahhmuah hi an tha thluh, a siatnak zianghman an um lo, ti cu si loin thil sia le setanlam [Satanic] lawnglawngih hmuh ding khal cu a si lo lala fawn. Asile, mi tam sawnih tha le tluangtlam zetih kan ruah theu mi Country, Pop, tvk. ahhin a siatnak zianghman an um lo tinak maw a si ke? Hipawl lak khalah a siatnak tampi hmuh ding an um ve ko. Pop hrekkhat tla cu Rock-pawl hnak hmanih luar le bese sawn an tampi. Sakhua lam khalah Khristian Rock ben tampi an um ve ko a sisi.
Minung kan nunnakah a mawi le a tha lawnglawng le tluangtlam zawng hlirih feh a theih lo ti hi awnmawimi hmuahhmuah in an rak theithiam thluh. Hi hi khuahlanpi ihsin Beethoven hman hin tuan mahmahin a rak thei zo sawn khi a rak si. A thinhengnak, duhamnak, lungkimlonak, riahsiat ninghannak, tvk. cu a hla thawn a rak phuangsuak, a irhsuaktir. Tu lai leitlun ih tingtang tum thiambik ti ih lar pakhat Rock Guitarist ‘Steve Vai’ khalin Interview ah “Rock awnmawi cu an rak cum vualvo dah, an rak relsiain an sawisel rero dah, asinan mawi le tha sin dingin kan tuah tha zo, thiamnak thawn kan thuam tha zo, awlsam le fiangfai dingin kan rem tha zo, rel ding cun rel cawk a si zik lo,…” a ti. Cun Germany ih Rock Star Scorpions ih Lead Vocalist ‘Klause Meine’ khalin Rock thu thawn pehparin Media pakhatin an suhnak ah “Thil tha lo [evil] tukih an hmuh hi cu a dik lo nasa…” tin a sim ve. -
Rock pu pakhat Ozzy Osbourne ih a umtudan le cangvaihdan ah “Na satanic tuk deuh a bang…” an ti tikah “Cu vek a si lo, mak dingin ka um hrim menmen a si hi…” a ti. Leitlun Heavy Rock/Metal ben ih hminthang zet pakhat Metallica ih Frontman le Lead Vocalist ‘James Hetfield’ tla a pa rori hi pastor a si ve si khawh, hi tivekih a um ruangah Khristian/Pathian fa a sinak a hlo, kan ti thei ding maw?
Tidai lawnglawng si loin tisa kan in duh can a um, ci lawnglawng si loin hmakphek kan hmeh duh can khal a um, thingpi thlum lawng si loin Coffee kha ruangro kan in duh can tla a um, serthlum hlir si loin serthur kan hiar can khal a um ve. Kan thisen tla a bangaw cio lo, kan ruahdan, kan hmuhdan le pawmdan tla a hmunkhat thei cio lo, mawi le tha kan ti mi le kan duhzawng khal a bangaw hai lo. Cuvekin awnmawi lam khalah mawi le tha kan ti mi le ngai nuam kan ti zawng an bangaw thei lo a si bik ko.
Curuangah a hleicein thangthar nonawn, mino lakah “Rock hla lo cu ka ngai paih lo, ngai nuam ka ti lo, ka di a riam thei lo,…” tvk. ih titu kan tampi ve ti hi a theithiam hrih lo pawlin kan theihthiampi a tul zet ding. Mai hmuhdan le theihdan lawng hi a dikbikah ruat loin a thatnak lam hawiih kan thlirsakawk thiam khal a tul zet.
Ziangkhal va siaw sehla, Rock-pawl cun; “Rock is Rock! Rock Alive! Rock Never Stops! Rock Will Never Die!...” tin an au kumkhua ko ding.
Salai Peter Din
No comments:
Post a Comment